警方日前宣佈搞咗個facebook專頁，幫差人做公關宣傳，雖然警方一早戴晒頭盔，講明粗口、侮辱、辱罵留言一定刪，但放得個場出嚟俾人玩，網民又點會放過？
話說警方fb專頁截至昨晚有37,000幾個likes，但一共發得5個po，每個有成幾千留言，短短幾日就有幾萬留言，9成9係問幾時告暗角七警、朱經緯，仲有喺法庭疑似畀假證供告黃絲嘅警員，仲有片有相有晒警員編號，結果前日開始，有網民發現警方開始大規模刪po，估計最少刪咗3,000個，但網民貼得仲快，刪到今日仲有過千批評警方留言。
許Sir又出動
黎棟國唔知係咪同網民睇同一個專頁？佢噚日同5個紀律部隊去北京訪問前，俾記者問佢點睇fb留言，佢竟然話有咁多市民瀏覽專頁係很好嘅第一步，仲話個專頁好多人讚好，又話呢個係同市民溝通嘅新渠道，相信警方會妥善處理網民留言，至於同團嘅一哥盧偉聰就冇回應。到下晝警方喺fb搵Q版卡通許Sir回應，話專頁一早設責任聲明，任何有粗言穢語、侮辱、辱罵等評論都會被刪除，亦一早講咗唔適宜喺專頁討論案件進度，但網民一樣照鬧，話警方唔答網民提問，咁開個社交網做乜？學CY出網誌自說自話啦！
李八方
mailto:[email protected]