大家收到稅單未呀？好快又到交稅季節，又係各大銀行搵人出嚟sell稅貸產品嘅時候，華僑永亨信用財務總經理吳幗欣噚日就打頭陣，唔知係咪諗住要頭威頭勢搶鏡，吳幗欣幾個月冇現身，噚日一出現，明顯係fit咗又索咗，加埋佢悉心化咗個靚妝，影相效果拍得住藝人或者模特兒喎。
見到吳幗欣明顯瘦咗一個圈，華華當然第一時間問佢瘦身秘方喇，吳幗欣笑笑口話，自己最近有跳舞！唔通係跳社交舞？街舞？佢都耍手擰頭，話係跳最普通嘅健康舞。睇嚟佢呢幾個月應該都好勤力跳，先至可以瘦得咁明顯。
佢噚日仲要悉心打扮，一襲黑色連身裙，配上閃爆嘅手飾、頸鏈，真係貴氣逼人。
唔講唔知，吳幗欣係七姊弟之首，自幼就持家有道，父母行開行埋，就要孭起照顧弟妹嘅責任，當然包括負責煮飯，所以中餐、西餐都難佢唔到，最叻就係煲老火湯。