2015年區議會選舉報名期展開，泛民今屆參選人數真係大縮水，話要行精兵制，好似民主黨比上屆少近40人，公民黨就由派逾40人縮到得25，佢哋話派得出選，在黨內考勤都有番咁上吓。
公民黨一直俾人話重視明星效應，地區工作就好一般，仲記得上屆區選之前，民主黨單仲偕曾揶揄公民黨喺高空工作，喺天上飛緊仲未降落，花生友心血來潮搵番公民黨上屆參選名單，對比之下，發現今屆仲留低參選嘅得四分之一左右，當中6個係競逐連任，至於上屆選輸咗嘅好多都冇影喇，今屆派25人參選，當中12人係首次出戰，佔整體約半。
公民黨標榜議會功能
公民黨不善於地區「揼石仔」，所以特別標榜選區議員除咗服務社區外，仲有其他功能，包括6個立法會議席由區議員擔任，同時有權做選委，選出下屆特首等，希望選民記得區議員對社會嘅影響絕對唔止係修橋補路、通渠、落雨提人收衫㗎。
至於上屆大舉派人參選嘅社民連，今屆擬只派5人出戰，嚟緊星期日有造勢活動，花生友聽聞，佢哋諗緊派唔派人狙擊梁志祥、鍾樹根、王國興等建制大佬，就算冇勝算都唔畀佢哋贏得咁輕鬆。
周二、四刊出
花生友