何傲兒（Lily）和周子揚的感情之間，一直隔住「爺爺」林建名，早前周子揚和何傲兒被警察「照田雞」，何傲兒最終只承認跟周子揚屬朋友關係，但昨日突然有報道指周子揚「閃上」大台藝員「翻版唐詩詠」曹思詩，二人更相約放狗。
本報昨日電話訪問周子揚問他是否約會曹思詩，他越講越勞氣說：「絕對唔係報道所講密會，對方多次叫我出去睇狗，我之前同Lily都諗過想養隻松鼠狗，所以先出去睇吓，飲嘢加放狗都冇20分鐘，唔知點解會有咁大篇報道囉！好似有人悉心安排咁，我絕對冇上佢屋企，我個心一直喺Lily度。𠵱家都冇心情識其他人，之前件事都已經令我哋好困擾，件事都未解決邊有心情呀！」
「努力都係為咗佢」
周子揚被問到跟何傲兒似是而非的關係，他說：「我一直視佢係最重要嘅人，一心一意對佢，我好想公開佢做我女朋友，可以正常發展，互相鼓勵。我努力工作都係為咗佢，佢就係我一個推動力，我認識佢係一個好善良嘅女仔，所以咁耐以來，發生咁多新聞，面對咁多壓力同問題，我都一直咁愛錫佢，體諒佢各方面嘅壓力，好希望有一日可以同佢開花結果，好想保護佢，同埋想講同佢講句『對唔住』，可能嗰篇報道會帶畀佢麻煩同誤解，但係我心入面由頭到尾只係得佢一個。」
何傲兒一直避而不談的關係，周子揚宣之於口，是不是想公開關係？他說：「我𠵱家唔係公開關係，我係想講我感受。」啞忍多時的周子揚被問到是不是忍得好辛苦，他說：「唔辛苦，我淨係知道我好珍惜佢，同埋我哋嘅愛情。我淨係想表達我呢幾年嘅感受，我只係想簡簡單單正常咁拍拖，好似一般情侶咁拍拖啫！」
採訪：非非