前特首曾蔭權因為「曾大屋」被起訴，唔少目光開始落喺袋咗澳洲UGL財團5,000萬嘅梁振英身上，睇吓佢會唔會落鑊。政府新聞處官方twitter前日些牙CY回應煲呔被控嘅新聞時，竟然變咗「特首梁振英指律政司檢控前特首梁振英（CY Leung says the Department of Justice's decision to prosecute former Chief Executive CY Leung…）」（圖）。
最先揭發錯處嘅係英國駐港澳總領事吳若蘭，佢喺twitter轉發新聞處個帖話「打錯咗少少字（bit of a typo here）」，亦有網民講笑話冇寫錯，其實新聞處係預言家，個po早咗兩年出啫。
新聞處噚晚喺fb解釋，話出錯係因為個系統嘅「自動校正設定」問題，網站條稿係冇寫錯嘅，仲話已取消個設定，但佢哋用【我們不是預言家】做標籤，網民梗係再食住抽水廣傳，話新聞處係咪暗示「我哋冇預言CY畀人拉」？方丈好小器㗎喎，新聞處保重嘞！