由爾冬陞執導的電影《我是路人甲》前晚在圓方首映，除了獲薛凱琪、蔡一智和錢嘉樂等人出席外，張智霖（Chilam）和袁詠儀（靚靚）更與兩名稀客到場，她們就是在90年與靚靚一齊選港姐的翁杏蘭和姚康莉（Connie），當年的冠軍是靚靚，亞軍是翁杏蘭，Connie則是第四名。
「好似25年前咁低B」
正所謂三個女人一個墟，難得三人同場，所以Chilam訪問表明因為工作太攰而不想說話，並將說話重任交給靚靚，靚靚說：「我哋嘅友誼已經25年，Connie喺香港，杏蘭就喺芝加哥好多年，佢已經8年冇返香港，所以我今年點都要喺香港，佢只係留一個禮拜，我想陪多佢幾日，真係好開心。」問靚靚有否招呼好友在家中留宿？她笑說：「唔係喎，我唔得喎，我好怪，要好乾淨企理㗎嘛，呢個鬼婆好亂嚟，所以佢住喺Connie度，Connie都係半個鬼婆，所以咪好啱。」她續說：「我主要會帶佢去食嘢，本來諗住同佢剪頭髮，點知髮型師甩咗底，所以今晚睇戲，聽日就打邊爐，後日食日本菜。」
接着她們三人齊齊接受訪問，問她們是否每次回來都會聚會？靚靚說：「基本上會，不過我真係好開心，我哋未生仔之前，經常都一齊去旅行，難得咁複雜嘅娛樂圈入面keep到友誼咁耐，翁杏蘭𠵱家都好似25年前咁低B。」再問當年第三名，靚靚說：「係梁小冰，小冰比較斯文，冇我哋咁嘈，所以由選美到𠵱家我哋都合得嚟，佢哋雖然唔係喺呢個圈，但係都好明白我。」
問三個人一齊時哪個會「搶晒嘢講」，Connie就手指靚靚並說：「靚靚講晒啲嘢。」杏蘭則說三個都會搶着說，靚靚補充：「我哋三個都會講，8年冇見過佢，梗係要將8年嘅嘢講晒出嚟，佢呢幾日都有排煩。」
問到翁杏蘭的近況，她說：「我結咗婚十幾年，未有BB，𠵱家做關於電腦嘅嘢，其實舊年都有返過嚟，不過靚靚趕唔到返香港陪我，我啲屋企人喺晒美國，好少返香港。」至於會否羨慕老友已經生了BB？她說：「唔會，不過好戥佢哋開心，見過靚靚個仔，好得意好叻仔。」
採訪：張俊銘
攝影：陳慧安
