《世界經濟論壇》發表「2015/2016年全球競爭力報告」，瑞士排名世界第一，新加坡第二，香港第七，報告指香港在基建方面，競爭力排第一，金融市場發展排第三，創新科技就遠不如人。
呢份報告出咗，相信又會成為一些人士嘅藉口，指香港有人拉布阻住創新科技局成立咯，而香港基建（現有）領導全球，將來又會點？睇吓高鐵超支延期，港珠澳大橋超支延期，沙中綫超支延期，西九龍文娛區有爛尾縮水危機，郵輪碼頭幾乎係空城，左丁山都幾怕香港素來良好嘅基建聲譽破產，拖低香港競爭力。新加坡勝在冇環保問題，一聲填海就可以第一時間動工，又有輸入外勞，搞基建比香港容易好多。點解新加坡好似從來都冇因填海而發生環保團體抗議、申請司法覆核等事情？係新加坡官員算無遺策，叻過香港官員太多，還是另有別情？蠢人如左丁山，唔識解釋，香港啲「親新派」，樣樣都話新加坡好過香港嘅評論員，或者知道答案。
中秋前一個星期，適逢日本有假期白銀週（Silver Week），肥仔K一位留學死黨乘機來港度假一周，跟肥仔K去赤柱、九龍城、旺角、中環周圍行，食勻意大利餐，翠華、越南菜、上海菜，玩得好高興，臨走前叫肥仔K帶佢去超市買月餅帶回東京，左丁山知道後，急忙阻止，叫佢嚟屋企任揀月餅，無謂再買吖。肥仔K嘅死黨原來係肥仔T，幾鍾意食月餅，任佢揀佢只係攞咗8個共兩盒，已經歡喜到極。左丁山問佢，「你對香港有何印象？」肥仔T話：「我去過德國實習，去過新加坡一個短時期，以前細路仔時跟爸爸到過香港幾次，我都係最鍾意香港，我在跨國公司亞洲總部工作，公司正考慮由東京搬去新加坡還是香港，話事人來自歐洲，話有好大機會將總部搬去新加坡，叫同事簽名自願轉移（transfer）去新加坡，但只有好少人肯簽名，因為我地個個想搬來香港，正向上頭爭取！」咁都得？香港有乜好呀？肥仔T話：「香港生活多元化，城市夠活力，放工後周圍有活動，新加坡好悶好悶㗎！」咁公司高層為何不理「民意」？肥仔T話：「高層話新加坡有好多班機去印度澳紐及東南亞，我地在中國在上海已有分公司總部，唔到我地理，中國以外大市場就係東南亞及印度澳紐，咪係咁囉！」哦，唔講唔知，從香港開拓東南亞、南亞地區業務，航班係比較少，而第三條跑道落成遙遙無期，咪蝕底俾新加坡咯。