練馬師鄭俊偉剛周日以「好好計」衝擊日本短途馬錦標失敗，同日卻在港憑「碧科」捧香港中華總商會115周年會慶盃。今晚快活谷夜賽，鄭俊偉全晚獨出一駒，以「創意寶」單刀赴會，結果此駒於第五場四班1200米，在41歲現役最老華將賴維銘胯下，爆出11倍冷Win，轉倉後季內兩戰一勝一季，除了幫鄭俊偉省靚招牌外，此駒亦助賴維銘打開今季勝門，台前幕後皆大歡喜。
呢場三甲馬鬥冷，第二名由46倍在港初出馬東廐馬「靚先生」拎到，Ｑ冷至227倍；賴維銘與亞軍「靚先生」鞍上人48歲的巫斯義，開出加埋合共89歲的騎師Ｑ。
第三名仲杰，由全場最冷189倍之姚廐馬「馬狀元」夥拍梁家俊取得，五歲馬第二季出賽，首度跑單位數名次即上名，第四名係拉士一度突圍而埋唔到尾之匆出大熱門「旅遊一哥」，四重彩冷到每注派114萬幾。