早陣子一首洗腦膠歌紅爆網絡，有人慨嘆在樂壇正經八百認真唱無出路。謝安琪（Kay）今年入行十周年，卻一路認真走來，唱盡社會現象，涉獵爭議話題。事業歷過高低起跌，她所念念不忘的是入行的初衷，期待越唱，可以越自由。
撰文：趙潔恆
攝影：郭賢興
化妝：Kris Wong
髮型：Eve Chiu of Queen's Private i Salon
服裝提供：I.T
入行十周年，謝安琪最大的project，就是後天在澳門展開的世界巡迴演唱會，之後會再去台灣、內地、馬來西亞與美加等地，香港是最後一站，明年4月才舉行。一講演唱會，觀眾特別期待表演嘉賓，會否邀請麥浚龍合唱一曲《羅生門》？「龍龍好似忙緊拍戲喎，如果佢得就梗係好啦，不過賣個關子先，總之唔會令粉絲失望啦！」
留言要負責
《羅生門》唱到街知巷聞，更衍生出一首葉蘊儀主唱的《中女羅生門》，Kay都有留意，「我覺得葉蘊儀真係好勇敢，首歌嘅歌詞講出一個中女好想嫁人嘅心聲，有啲人會覺得首歌幾好笑喎，我就覺得係個心酸故事。」歌曲被惡搞，Kay一點也不介意，還表示無任歡迎：「我都幾鍾意睇二次創作，我啲歌都俾人改過，我好歡迎㗎，好多都幾高質素，製作又認真，就算特登好粗糙都係種風格。好玩在佢哋會講啲好貼身嘅話題，仲有血有肉，好好睇呀！」大方面對二次創作，但面對網絡欺凌惡意攻擊，這位高登女神就企硬不容忍，「唔知呢，唔知未來會唔會有監控或者一啲規定，希望網上嘅留言者都可以負責任，唔可以匿名，要有確切身份先有發言權，咁樣情況可能會好啲啩。」
老公樣樣好
Kay十年來面對過不少風雨，她慶幸人生路上遇到老公張繼聰，「我覺得遇上佢係我嘅彩數，我哋一齊入行，嗰陣時我唔識做訪問，一人多我就覺得唔自然，但見到佢就成日都好自由自在好happy，我就抄佢點做。」自認曾經相當執着，也因為老公而慢慢改變，「到後來我哋拍拖結婚，各自經歷好多挫折，佢成長得好快，喺短時間好似脫咗個殼變咗另外一個人，佢同時有入世同出世嘅特質，知道點待人接物，遇到好困擾嘅事，佢又可以睇得好淡放得低。佢令我覺得好安穩，以前一有嘢想唔通會hang咗機咁又瞓唔着，𠵱家識得放開，都係因為佢。」連管教囝囝張瞻，Kay都謂老公比較有一手：「我就全天候同小朋友玩嘅，佢係比較嚴厲啲，佢用兩三句就可以令小朋友明白，又冇畀壓力小朋友，我有時都會偷錄佢點教仔，幾好嘢喎，我都諗唔到咁講。」
歌者的心聲
去年推出的幾首歌曲《勢不兩立》、《雞蛋與高牆》、《獨家村》都引起迴響，Kay覺得相比十年前，社會環境都變化很大，身為歌手渴望可以有更自由的空間𣈱所欲言：「𠵱家好多事都令人好敏感，敏感到任何嘅嘢都好容易俾人放大，好多人都會俾人塑造成推動某啲事嘅icon，好多事好難好理智去討論，可唔可以冷靜啲呢？好似好難。我希望可以越行越寬闊，我想有一個社會可以自由自在，去討論我哋想講嘅議題，音樂係好好嘅媒介，將好嘅事物講出嚟，而我哋唔需要擔心或者受到壓力，係我作為歌手最期待嘅。」
Kay's Emoji
驚！第一次入錄音室
Kay：覺得每一秒都好似掟錢出去，想做個盡責嘅員工唱好每粒音，好驚浪費咗studio hour，同埋第一次喺咁空洞嘅空間戴住headphone，有耳鳴感覺，好緊張，諗番覺得自己好儍豬豬。
呆！開收音機聽到第一首歌
Kay：第一次喺收音機聽到自己第一首歌《姿色份子》，個感覺好古怪㗎，仲諗：呢個邊個嚟㗎，嚇到呆咗，聽四分鐘覺得好漫長，但又好感動，真係有人播我嘅歌，佢係商台嘅梁文禮。
勇！第一次踏紅館克服畏高
Kay：我有嚴重畏高嘅，但2009年第一次喺紅館開個唱，opening就升到七層樓咁高去唱，係做演唱會先有種火谷到我去做呢件事，好似好老土，但真係音樂先令我咁勇。
更多精采時尚內容，盡在 http://add.appledaily.com 。