自從由政制及內地事務局副局長升呢至民政事務局局長後，劉江華無懼網民惡搞頻頻出動，文化、藝術、青年、體育活動乜都去勻。噚日佢就到訪沙田香港體育學院，其間同超過70個運動員會面，聽吓佢哋嘅訓練同比賽情況，又視察最新儀器設施兼睇埋體育示範。
雖則劉江華唔係體育健將，但據知乒乓波都有一手，噚日露兩手，同香港乒乓球代表隊運動員黃鎮廷打場友誼波。現場探子回報，紮晒馬嘅劉華（圖）果然有姿勢兼有實際，唔係齋執波，而係冚嚟冚去有來有往。
查實黃鎮廷係高禮澤徒弟，佢最近喺泰國舉行嘅亞洲乒乓球錦標賽男單賽，同中華台北選手莊智淵並列銅牌，劉華越級挑戰，絕對唔失禮。