【灣仔】坐擁家族80億的莊士太子爺莊家彬今年初與9年情女友傅明憲分手後，內地新女友程新惠（Grace）火速登場，但亦冇礙他的桃花運，日前他同富二代好友去飯局，就深受王秀琳（Mango）及36G退選港姐Judy歡迎，席間打邊爐唱K密密斟，更被雜誌影到疑似左擁右抱，令他前日要澄清：「全香港都知我有女朋友。」向女友派定心丸。
食飯期間四圍望
莊家彬前晚以實際行動證明自己名草有主，他帶Grace去灣仔吃四川菜，同行還有一名女性友人。在食肆中，莊家彬就與Grace排排坐，二人傾談不太多，加上又不是在私人房進食，沒有早前同Mango及Judy飯局中的情緒高漲，全程表現拘謹。未知莊家彬是否因早前飯局「出事」後有陰影，進食期間全程四圍望，好有警覺戒心。
三人大概10點吃完晚餐，離開時正下着毛毛雨，食飽的莊家彬不理雨勢落到大街即點「事後煙」，齊齊要行到後一條街上車。當中戴着cap帽的Grace更戴上口罩。其間，莊家彬邊開路邊打電話，似相約司機上車位，眾人最後走到附近咖啡店避雨候車，當時雨勢加大，Grace蹺埋雙手表現得不耐煩，莊家彬見狀即上前安撫女友，大概等5分鐘，莊的平治房車到，3人急急上車離開。
採訪、攝影：畢紹基、徐錦池
