全球首個Heart Panda大熊貓巡迴展，繼今年中先後去德國柏林同上海後，即將抵港嘞。呢個由成都領匯文化傳播與大中華文化全球協會攜手舉辦、長實同1881 Heritage協辦嘅「Let's Love善˙愛」香港站展覽，本月26日至11月4日喺尖沙嘴「1881」舉行，屆時逾60座極具中國色彩，唔同姿態造型嘅大熊貓，會同全港市民見面，香港站仲邀請到唔少本地名人參與創作，包括長實執董趙國雄、歌手陳慧琳，藝術家及策展人楊素珊及油畫家陳竹君等。Heart Panda舊年開始走訪國內頂尖美術院校徵集佳作，收到逾3,000份作品；展覽結束後，每座大熊貓都會喺11月中進行慈善拍賣，善款會支持善學慈善基金，幫助國內患有弱視同兔唇嘅貧困兒童。