早前宣佈不惜辭去法國餐廳廚師高薪厚職、出戰中西區西營盤選區同民建聯現任區議員盧懿杏硬撼嘅「西環飛躍動力」靚仔廚師伍永德（圖），原來曾經歷兩段人生低谷。
呢一年頻頻落區、已報名參選嘅阿德主動向八方透露，2005年因年少無知，身藏少量K仔喺街上被警方截查，被判過守行為一年。
去到2012年，佢有被拍檔出賣，冇咗份工，加上失戀，喺酒吧飲大咗同人打交，被判180小時社會服務令。
阿德睇番往事，都覺得以前太百厭同唔識諗，指兩次出事後，都感受到父母其實好愛自己。
阿德決心重新做人，終於喺兩年前協助一間法國餐廳取得米芝蓮推介，𠵱家同父母關係亦非常好，兩老知佢為區選放棄份好工，都非常支持，令阿德好感動。