大學教授之中，理學院、社會科學院、工學院比較注重教員有無博士學位，至於商學院、文學院、醫學院、法律學院等傳統上係接受非博士做教授嘅，以往英式大學（港大係英式）冇咁注重博士學位，美式大學就比較執着，但講到尾，有博士學位先至可以在大學任教，只不過係近二十年之事。原因大概有兩個，（一）全世界博士生人數泛濫，博士周街係，學士係一毫子買到一打，大學請人，唔係博士，邊度有資格噃，現在更發展到即使係名牌大學博士都要做「博士後研究」（其實即係研究助理），未必搵到助理教授之職；（二）不同之大學排名，往往數埋教員之中嘅博士比例，故此大學請人，要考慮埋排名因素，非博士不請，過往嘅國學大師如錢穆、唐君毅、牟宗三，現在嘅饒宗頤，皆無博士學位，錢穆更加未讀過大學，以今日嘅標準，教中學都冇資格，但左丁山至今未見過佢哋有邊一位學生嘅學術成就可以追得上佢哋，余英時或者係唯一嘅例外。
教法律，教會計等科，實際經驗與資歷最重要，有博士學位其實無甚增值（value added），故此港大法學院雖則博士比例偏低，在世界上仍有一定地位，畢業出嚟嘅校友在香港出任大法官，資深大律師，好多著名律師，對香港法治制度之維護，好有貢獻，前任院長陳文敏，現任院長Michael Hor都冇博士學位，咁又點啫！
港大校委會若然咁注重博士，不如咁啦，校委會通過一項議案，要在三五年內開除或遣散所有無博士學位教員，順勢清除晒法律學院啲「黃絲帶」，請番一啲名牌大學博士代替，咁樣做，會符合港大之「最大及長遠利益」啩？港大選副校一事，造成港大校友分裂，程介明（港大教育學院榮休教授），寫文章順便痛駡葉建源（港大校友），報界名人石鏡泉支持校委會，反對陳文敏，而前政府高官王永平就公開要求十二名校委（即李國章、盧寵茂等）辭職，顯見港大校友分成兩派。新亞師弟盧永雄參加飯局，眼見同枱食飯嘅幾位港大資深校友一講到陳文敏就立即分成「黃絲帶」「藍絲帶」，拗到面紅耳熱，左丁山亦有類似經歷，不禁想到呢個不時講適度有為嘅特區行政長官，真有本事，上任三年就可以搞到香港人分裂互鬥！