扎根深水埗麗閣邨12年嘅民協馮檢基（圖），最近被民建聯、工聯會聯手力撐嘅小花陳穎欣狙擊，前民協成員黃仲棋上周亦預告喺呢區出選，令阿基今屆區選面臨前所未有挑戰。
阿基噚日透露諗多一兩日、同一班核心義工商討後，先正式宣佈係咪續選，但表明「縱使有人𠝹票我都唔怕」，相信佢出選機會仍相當大。佢又表明自己眼中「沒有對手，只有居民」，自問地區工作一向勤力，細至一塊地磚、大至一個公園，都有為居民爭取，仲指小花對手為求當選，最近對佢作出唔少失實陳述。至於前黨友突然復出挑機，阿基話上周收到對方WhatsApp至知，慨嘆昔日老友突變敵人，「我唔敢話有人操控，但一定唔係巧合」，指自己同對手無乜嘢好講，「佢12年前已放棄咗呢個區」。