耀才（1428）最近又發盈喜，唔知係咪生意越做越大，連行政總裁（CEO）都要兩位先夠用。公司最近宣佈，委任許繹彬（Edmond）做執董兼聯席CEO，年薪120萬元另額外加花紅，同公司現任CEO陳啟峰（Nelson）拍住做，Edmond負責內部行政決策與銷售，Nelson就專注對外品牌建立與形象等等。
41歲嘅Edmond喺證券業有廿年經驗，2010年加入耀才，由分行經理做起，之後平步青雲，一路升職，短短5年升到聯席CEO。他謙稱，升職主要靠將勤補拙，「人哋返9至6，我咪返8至8，勤力有回報啫」。
查實耀才請聯席CEO已經唔係第一次，2012年初曾經搵來吳劍華與梁衍燊做聯席CEO，夾住Nelson三個人一齊管理，點知唔夠半年，兩位仁兄就火速低調離職了。