社民連成員噚日喺雨中到特首辦示威，抗議12「梁粉」校委干預港大學術自主，其間被行政署職員阻止攜帶「12惡棍」黑箱、橫額同黃傘入場，最終黃浩銘等只准帶紙聲明進入特首辦，當黃浩銘向步近嘅梁振英高喊「可恥」，並試圖灑下用聲明撕成嘅紙碎時，即刻被兩名保安向後屈手，再喺四名保安拉扯下，被帶離特首辦（圖）。
黃浩銘批評，行政署唔准帶黃傘非常奇怪，又話保安嘅手法「非常離譜」。乜黃傘已成特首辦違禁品？八方問過行政署，發言人回覆，請願人士唔可以帶任何有可能妨礙場地公共秩序、或對其他請願人士構成滋擾或危險嘅物品進入特首辦外請願範圍；而進入請願區時，要將雨傘放喺雨傘架上。