嚟緊周三（7日）快活谷賽事，全港最老嘅其中一匹馬「享耆成」將會休後復出爭二班1200米，馬主保良局前主席鄭錦鐘排位前接受訪問，佢對愛駒有乜睇法呢？鄭錦鐘說：「佢季內初出啦，試咗兩課閘啦，九歲啦，希望抽個好檔，盡力跑啦！」結果真係畀佢得償所願，「享耆成」抽個靚靚二檔，估計可以全程貼欄慳位競跑。
有啲馬鍾意跑濕地，最近天氣唔太穩定，預測周三有雨，對「享耆成」有幫助抑或有障礙呢？
鄭錦鐘說：「佢過去都係贏好地為主，如果再落雨，唔知繼續落去個地會點樣，亦唔知對佢有乜影響。」
其實勝負嘅變數未必係場地，而係隻馬嘅心情，「享耆成」可以話實力驚人，多年來贏過九場咁多，固然前速銳利，不時一起步就彈出，經常可以一放到底，但今年三月亦試過早段包尾，單憑半條直路衝上過晒贏馬。不過呢匹老頑童亦可以話係計時炸彈，唔止一次起步立地成佛，企定定喺度，未跑先輸，亦試過轉彎不受控制，嚴重外閃飛咗出去落敗，最鍾意同騎師玩嘢，究竟佢今次會唔會乖乖咁跑，真係要跑過先知咯。