NBA下個月就開鑼，唔少球隊都開展季前賽，上季王者勇士周一首度出師，喺聖荷西鬥速龍，憑「浪花兄弟」史堤芬居里（Stephen Curry）同K湯遜（Klay Thompson）各取14分，贏95:87打開勝利之門。
勇士今季維持基本骨幹力圖衞冕，除咗兩位射手居里同K湯遜、上季FMVP伊古達拉（Andre Iguodala）外，最大轉變係獲得前助攻王尼殊（Steve Nash）加盟做顧問。見居里新一季大隻咗，防守決心都加強埋，季前賽都可以打到第三節未完已經六犯離場，全場七射五中累積14分；佢好兄弟K湯遜都交出14分，加埋巴西後衞巴保沙（Leandro Barbosa）貢獻15分，幫勇士以八分擊敗速龍，有個好開始。
首戰六犯vs六號「新衫」
上季東岸冠軍騎士同日就搞球隊分隊賽，比賽期間仲玩吓中線超遠射，結果射手JR史密夫（J.R. Smith）一射「穿針」，幫一位退役美軍贏到三萬美元獎金。講番場波，前鋒勒邦占士（LeBron James）改着六號波衫上陣，咁啱佢又拎到六分；佢賽後解釋自己冇打算改冧巴，六號只係練習用，比賽會照着23號。