愛國歌手兼「人和家富」馬主張明敏，日前出席紅館十．一慶典，同阿仔張頌華合唱一曲《父子》，除咗《父子》，張明敏當然唔少得唱首本嘅《我的中國心》等名曲，姑勿論大家啱唔啱聽，鍾唔鍾意張明敏嘅政治立場，對文家良主帥巫斯義嚟講，如果冇咗張明敏呢位馬主，自己可能冇得留港。
大家都知老巫上季尾因為陷入公司騎師牌照不獲續牌危機，於是改為申請做主帥，根據阿Man文家良透露，佢話今季肯簽巫斯義，念頭原來係佢上季尾騎細細粒，又好尺寸嘅馬仔「人和家富」兩次，一次力壓「皇子」險勝鼻位，另一次火併「金筷子」輸頭位僅敗，兩次老巫都發揮超水準，因而文家良覺得老巫可肩負重任，可幫佢搞掂廐中其他同樣難搞嘅馬，所以促成老巫獲一紙主帥合約。
講番「人和家富」，上月9號季內初出跑谷草1200排12檔，老巫一流演繹下，只輸畀少負17磅嘅「愛寶」屈居亞軍，證明人馬的確合拍。周三晚(7日)「人和家富」再出，移入8檔好得多，老巫對張明敏、文家良知恩圖報，一定加多幾分肉緊，好大機會補中。