「永別僱用」一直loop，發酵度熱爆。既然言者有心鑿鑿，聽者hea hea受落，大家做好「永別僱用」的連鎖反應大崩盤準備。
梁特點名加大力度趕搭北上尾班車的年青人（心裏卻呼之為廢青），終於放下心頭大石，不必經過審查樂器的港鐵，告別一路向北，只消等埋大學畢業，即刻領取綜援可也。永別僱用嘛，搵工都慳番，理直氣壯向政府攤大手板攞家用，有得揀，留俾李國章做老闆！唔該佢順便問候盧寵茂，插水插成咁，唔驚冇人請咩？
永別僱用，阻人搵食！主角不是佔旺時期喊打喊殺的潮×小巴，而是百年老店天之驕子的港大畢業生！黃金周假期殺來香港考SAT的內地尖子，父母親睇完新聞，滾水淥腳，火速安排子女赴美升學。香港八大院校，派出十二校委在SAT試場外派埋叉燒飯兜客，都係食白果。永別僱用，累到大學學額過剩，大學空凳多多，宿舍人影冇隻衰過鬼屋。永別僱用！邊個渾球發明的！一個學期令香港大學學府損失幾萬個億！Google scholar的impact factor是陳文敏二百倍、以雷鼎鳴李輝與李天命為佼佼者的大學教授，計算一下，個心當堂離一離，快些叫阿爺暴力救市吧。