文：夏去秋來，最近睇歐美YouTuber秋冬彩妝教學，十個有九個都大力推薦酒紅妝，煙熏眼妝配性感紫唇，靚之餘更不失型味。常認為此類妝容難化，一不留神就變如花，睇得心癢癢又不知從何入手。今次就請來Lancome的首席化妝師Tanya Tin，教你輕鬆駕馭酒紅妝。
Tanya話想彩妝帶浪漫氣息，可選紫色煙熏眼配紫紅唇。今年眼妝流行灰色系，色彩偏暗的灰紫，使眼妝帶性感氣息。由於灰紫煙熏眼已夠濃艷，用眼線液輕畫一條幼眼線即可。
酒紅唇色今年大熱，歐美流行帶光澤的high-shine效果。深唇色較易失手，可先以唇筆勾畫唇形並作打底，再用保濕度高的唇膏或唇彩增加光澤感。怕歐美系酒紅唇膏太誇張，韓國亦流行紫紅咬唇妝，選色系偏桃紅的唇彩，肌膚更顯亮白。化咬唇妝可先用裸色唇膏打底，再於唇中央輕塗紫紅唇彩，用手指抹開，比歐美唇妝更自然，適合新手嘗試。
除紫色眼影外，亦可試今季流行的彩色睫毛液。Tanya教路：「一般亞洲人的睫毛都是黑色的，想令紫色更突出，可先用白色睫毛液打底，再上紫色睫毛液，就能出九成紫色效果。」由於眼唇已較深色搶眼，胭脂宜淡不宜濃，應使用淡粉紅輕添血色即可，否則易有如花濃妝感。
記者：楊麗珊
攝影：楊錦文