香港總商會靚女總裁袁莎妮Shirley噚日介紹咗個男仔畀八方識，原來係總商會嘅新任高級經濟師董一岳Rocky（圖）。本身係科法斯亞太區經濟師嘅Rocky稱認同總商會嘅方向，好開心有機會幫手；Shirley笑稱除咗誠意同魅力，都要出動重金禮聘。
Rocky上任一個月未夠，已拜訪咗會內唔同嘅committee。中學就讀香港華仁嘅佢去過美國讀書，40歲未夠已有兩個小朋友。佢話嚟緊好多研究要做，會同Shirley好好合作。
Shirley就強調點樣保持香港競爭力，係好重要嘅課題，特首嚟緊會就施政報告諮詢，總商會建議推行雙層利得稅，將應課稅收入200萬以下嘅稅率下調至10%、200萬以上就沿用𠵱家嘅16.5%，總商會話此建議下受惠嘅企業，80%（約7.8萬）係中小企，覺得特首冇理由say no。