機管局前行政總裁許漢忠，今年9月過檔新創建（659）做副行政總裁，但依然心繫航空界！
話說許漢忠噚日跟一班傳媒行家食晏，一講起機場三跑，佢即刻興致勃勃，指當年港英政府規劃赤鱲角機場嗰陣，中間有唔少政治事件，搞到整個規劃唔夠完善。
佢話，如果當年諗得長遠啲，例如一早填海預留地方興建三跑，今日興建三跑就唔使用咁多錢。
講番新創建，公司搵得許漢忠入去，明顯睇中佢喺航空界嘅人脈與經驗。新創建旗下飛機租賃公司Goshawk，計劃明年買多20幾架飛機，令機隊規模增至70架以上。
許漢忠估計，未來幾年，油價都好難去返之前嘅高位，航空業發展會好好，租飛機嘅生意自然有得做咁話。