季前BBC有個網上問答遊戲叫「Which Premier League manager are you?」，回答10條問題有關被傳媒批評及出現危機時你會如何回應，遊戲便會給出一個評分並推測你是哪位領隊。很不幸，我是：羅渣士（圖右）！具體答案已忘記，大概是不得罪球員、傳媒的好好先生；其實也頗像真實世界的羅渣士；可惜，就是缺乏統領大會的大將之風；現在被炒，算遲喇！
在位三年多，花過逾三億鎊買人，卻充斥巴洛迪利、洛夫雲、拿沙馬高域等未能提升球隊的貴價貨，已是眼光問題；前季爭標關鍵時間屢屢腳軟，與其話謝拉特黑仔，不如歸咎於羅帥功力不夠；最終留不住謝四及史達寧，亦是缺乏領軍魅力。人家唔信你有力帶隊爭標，還留隊浪費時間？紅軍則用了三年時間，再次證明中型班成功領隊，未必有力執掌有名望大會。
至於新特蘭的艾禾卡特可能都知上季尾驚險護級有幾好運 （無印象的請找他們臨尾連勝修頓及愛華頓兩仗片段看看）；雖然六合彩有云：運氣，話嚟就嚟！其實一樣話走就走；決定自己辭職，可能佢老人家都感到新特蘭已無藥可救。另一邊廂，頑強的摩佬則以七分半鐘偉論回應記者的一句提問，不斷重覆球證有問題、我唔會走、車仔炒我搵唔到更好領隊……做咩箒！記者問你點睇場波咋，都無問你驚唔驚俾人炒，乜你好驚咩？
方栢翹
now足球評述員