練馬師大摩今季一直只派馬在沙田上陣，之前谷草賽事就零報名，直到今個禮拜三夜賽，大摩終於肯派馬出戰快活谷，突然出招顯然成竹在胸，而且陣容不弱，「獅鷲」、「花月流星」、「君悅灣」及「飛龍駒」全部曾在谷草有過表現，前三駒更加贏過此場地，可替馬房打響谷草頭炮。
「獅鷲」兩次贏馬均跑四班谷草一哩所得，可見路有專長，上季尾兩次配郭能獲一冠一第五，今季續配此子上陣，可收人馬合拍之效，埋門更安排由郭能親自試大閘，做足工夫而來，當然唔可以睇小。
另外，「花月流星」上季最後三仗獲冠亞季各一，當起五歲自購馬正踏上升軌，贏馬一役正是在谷草A跑道所得，今次等番A欄復出，賽前試大閘一放到底，證明狀態已操起，有力取得跨季連捷。