港大教育學院副教授李輝（圖）成為批陳文敏悍將，呢兩日佢日日開腔炮轟陳文敏，又話自己論文被引用嘅「影響因子」係陳文敏嘅200倍，之後好多學者出手反駁同恥笑佢，但李輝似乎唔當一回事，但佢噚日上商台《在晴朗的一天出發》，再批評陳文敏嘅時候，顯露咗佢呢個副教授智力高到乜程度！
話說節目入面李副教授話，佢冇留意邊個爆陳文敏任命私隱，主持提佢第一次係11月26日《文匯報》爆先，呢個時候李副教授嚟料喇，反問主持係舊年定今年嘅11月，主持都即時俾佢呢個咁難答問題考起，只好話今年11月未到喎！有網民恥笑李副教授連今年11月到咗未都搞唔清，點搞得清陳文敏學術地位有幾高！