國慶假放咗，金融服務界嘅國慶慶祝酒會就噚晚先舉行，主人家請埋特首梁振英、財經事務及庫務局局長陳家強、副局長劉怡翔、港交所（388）主席周松崗、證券學會會長李細燕、立法會金融界議員吳亮星等人出席。全台都係猛人，圍埋一齊唱歌，真係要聽吓邊位歌喉好。
《歌唱祖國》已經係呢個酒會連續兩年嘅飲歌，據聞陳家強收到邀請，知道又係呢首歌，都唔使點練歌，事關舊年佢唱過，唔怪得佢連貓紙都唔使用喇。陳家強開頭都有份揸咪唱，但唱唱吓遞咗支咪畀隔籬嗰位中資證券業協會會長譚岳衡，自己繼續好有自信咁唱。
立法會金融服務界議員張華峰負責祝酒，見佢滿場飛招呼賓客。佢一拍埋君陽證券董事鄧聲興身邊，一個張華峰幾乎等於兩個鄧聲興！可能張議員呢幾年成日坐住開會，少郁動，身形好似脹過做議員之前喎。