前特首曾蔭權被控兩項身為公職人員行為失當罪名，案件噚日喺東區裁判法院提堂，大批傳媒蜂擁採訪，場面墟冚。現場就有人幫忙打點傳媒採訪安排，呢個正正係公關界猛人，當年由傳媒轉做公關，兩度為曾蔭權助選嘅公關顧問游淑儀（Sukyi），佢噚日就帶埋同事到法院幫呢位落難前老細。
游2013年初創辦Y Communications公關公司，本身係財經記者出身嘅佢，自從轉做公關後，唔少政商界名人都係佢客仔，包括合和太子胡文新等。喺2012年特首選舉，候選人之一嘅唐英年被爆婚外情，當時需要重整及加強公關團隊，亦有傳考慮過搵佢加盟幫手。