廉政公署噚日高調「打大老虎」落案起訴前特首曾蔭權,不過老廉發新聞稿時就「甩轆」出錯,誤將涉案嘅建築設計師何周禮形容為「建築師」,但原來佢喺香港冇建築師資格,所以建築師註冊管理局隨即發公告澄清,話何周禮唔喺該局註冊紀錄入面,唔可以稱佢為建築師。
老廉下午隨即修改新聞稿,將「建築師」一詞改為「何周禮」,新聞稿亦冇再提及佢嘅資格。
據了解,廉署原本出稿前有查過何周禮嘅資料,發現佢喺英國同澳洲都有註冊做建築師,事後至知原來佢冇喺香港註冊,所以最初出稿時就寫佢係建築師,不過之後建築師註冊管理局有搵過老廉,老廉知衰就急急改番。