餐飲業競爭激烈，好多商人都要諗計搞搞新意思。本港老牌快餐店大家樂（341），冇幾耐之前選址紅磡黃埔花園，開咗首間韓式餐廳「The Cup」；公司最近又宣佈，另一個新品牌、日式餐廳「丼丼亭」即將開幕，估唔到選址又係黃埔花園。
「丼丼亭」將於本周開幕，呢間專食天婦羅嘅日本餐廳，地址喺紅磡黃埔花園第3期，正正係「The Cup」隔籬。計埋呢間新餐廳，大家樂成個集團喺黃埔花園有6間餐廳，幾乎成為黃埔居民嘅「衣食父母」。
有大家樂中人同華華講過，揀紅磡開舖，除咗因為租金較旺區平之外，區內居民對食亦有好大需求。特別係附近起咗好幾座理工大學學生宿舍，好多後生仔女過緊「冇飯」生活，所以咪咁鍾情喺黃埔開舖囉。