小米創辦人兼董事長雷軍每日都埋頭開會，但佢識work hard、play hard，一放假就做「課外活動」放鬆心情。華華聞說佢好鍾意滑雪，冬天一有時間就會去北京郊外的南山滑雪場一展身手。
據講雷軍對滑雪着迷，係因為受佢好友兼小米另一聯合創辦人王川「放毒」，大約十年前左右教雷軍滑雪，仲去埋世界各地挑戰各個滑雪場。玩得多，玩得專，越滑越斜，自然就會成為高手。聽講雷軍去得南山滑雪場，就一定要揀有32度斜的高難度賽道玩，斜度比例大約為1:1.6，爬上山都覺得辛苦，無啲身手同技巧都好難應付，隨時跌到一仆一碌。
正所謂「玩物養志」，雷軍一身滑雪好本領，年初為推介「小蟻運動相機」，佢就粉墨登場，帶機到南山走一轉。片段見佢戴住雪鏡，一隻手揸住自拍神器影住自己，一邊好平穩地由山上滑落，做返自己產品的生招牌。