今年十一黃金周內地旅客去咗另一個TST（Tokyo、Seoul、Taipei），有位訪日嘅內地旅客接受訪問時話旅遊購物係幫日本同解決實際經濟困難，應該感謝中國老百姓。這位內地旅客「大口氣」唔係冇道理，泱泱大國十億人口，辦理護照同出國簽證約一成，好難怪人哋牙擦擦。
雖然A股暴跌後又無乜起色，內地股民輸多過贏，但我又好buy有分析員提出股市低迷未必同內地外遊豪客有太大關聯，事關佢哋唔會九成揸股票，大部份資產係磚頭，輸到冇晒錢去旅行，多數係借孖展炒股嘅大媽。所以，出國旅行嘅內地客消費力有番咁上下。
中國旅客購物首選都係衫、鞋、化妝品同電子產品。日本百貨今年黃金周都為人民幣服務，旅客用銀聯卡去小田急百貨新宿店買嘢有95折，心齋橋大丸及名古屋松板屋仲推出微信支付。有秋葉原電器商話今年電飯煲銷量係比上年多一倍半。不過，中國旅客再托多幾個飯煲，日本家電龍頭東芝冇得受惠，股價今年首三季跌過四成。
另外，東芝擺平會計醜聞後，面臨電視業及電腦業務萎縮，東芝社長室町正志又向傳媒話會計醜聞令公司部份業務失去盈利能力，3年內請辭同再裁員。
C+B
本欄逢周一刊出