滙豐前亞太大班、現任澳新銀行（ANZ）行政總裁邵銘高，做到今年底就卸任ANZ舵手（仍續任董事會顧問至明年7月）。人稱「肥佬邵」嘅Mike，華華同佢相識於滙豐年代，當然要立即八吓佢跟住有乜搞作，定係榮休？佢好快趣回應話：多謝華華關心，但就暫時賣關子，「遲啲會再覆你一啲諗法」。
肥佬邵同ANZ分手，悉尼《先驅晨報》或已早着先機，8月初佢哋報道ANZ配售新股集資發佈會，但邵銘高未現身，只由財務總監Shayne Elliot（年底接任澳新CEO）主持。本地股評人胡孟青留意到呢則消息，跟住喺專欄寫咗篇《CEO缺席之謎》。
邵銘高縱橫銀行界37年（其中滙豐工作29年），華華記得04年佢剛升任滙豐CEO時，首次與數間本地報章會晤，一坐低已七情上面，講述自己97至00年間做阿根廷CEO時，俾社團追殺大腿中槍嘅經歷。