一場颱風搞到潘頓及雷神趕唔切返嚟，最終跑唔到全日賽事，策騎費同獎金損失，相信每人以六位數字計，仲要兩人昨日（3日）於澳洲客串都冇馬贏白行一趟，絕對係雙重損失。
第四場四班千二米，雷神原本攬實文廐「帝豪寶貝」唔放，晨課一手一腳操好兼騎開有感情，一心諗住今鋪幫馬主開齋，點知自己回防不及，反而益番文廐主帥巫斯義，人馬初次合作藉內檔之利，直路望空一加速即奠定勝局，3.4倍大熱輕輕鬆鬆贏馬，取勝過程同第三場同馬房之「大眾良駒」有異曲同工之妙。
無論如何，文家良今日跑完頭四場，已經憑「大眾良駒」同「帝豪寶貝」包辦第三口孖寶，取得開季以來代表作。「帝豪寶貝」由美女馬主黃燕婷擁有，佢係「深圳李嘉誠」黃楚標姪女，此駒帶畀佢以個人名義養馬以來首場頭馬。這天黃燕婷亦大晒美腿拉頭馬，成為凱旋門焦點。
呢場又係輕磅大冧巴馬世界，12號「帝豪寶貝」跑第一，13號「正白旗」跑第二。百億富豪大慈善家顧明均愛駒「正白旗」好冇運，直路發力時，前面之郭能座騎「綫路神駒」兩邊片來片去，連番阻住「正白旗」去路，令佢遲遲未能望空，最終後上不及做二奶，以不足一身位之微飲恨。第三名由都係3.4倍之次熱「閃耀鑽皇」拎到，「綫路神駒」則跑第四，同「正白旗」可以話係兩敗俱傷。