長和（001）主席李嘉誠的「撤資」風波，暫時似是告一段落。之不過，喺李嘉誠發「千言文」嘅3日後，長建（1038）及電能（006）就宣佈合組公司，收購葡萄牙風力發電公司Iberwind。喺呢啲敏感時刻又出外「購物」，集團都即刻戴定「頭盔」。
皆因單「刁」嘅新聞稿，字裏行間有唔少玄機。話到明唔少亞太區投資者去葡萄牙投資能源項目，仲點名講埋中國國家電網及中國長江三峽集團，兩間央企都有喺嗰邊「購物」。「長江基建將加入這些公司的行列，成為葡萄牙能源行業的其中一分子。」
集團舊陣時出去收購嗰陣，都係講吓項目前景有幾好，唔會拖埋其他人落水。唔知集團班管理層，係咪怕招人口實，所以講明「唔係得我一個」，希望淡化「走出去」嘅爭議，仲順便借啲意摑官媒一巴呢？