吳彥祖（Daniel）呢輪忙緊拍古天樂公司投資、林嶺東執導嘅新戲，不過佢日內都要請假同馮德倫（Stephen）返美國宣傳美劇《Into The Badlands》。
佢哋兩個首次幫美國有線電視台AMC聯合監製嘅美劇《Badlands》，將會喺下個月15日播映第一季，噚日有最新預告片同劇照出街，睇到套劇主打動作場面，而Daniel會變成一個好打得嘅武林高手。AMC睇咗片之後好滿意，已經通知佢哋要籌拍第二季，預計明年中前開拍，佢哋兩個日內就要出發去美國開會，同埋做第一季嘅宣傳。
馮德倫下季參演
第一季Stephen冇時間演出，喺第二季佢可能會加入，演一位誓要將Daniel打敗嘅武功高手。噚日馮仁昭打畀Stephen，問佢首次拍美劇有乜嘢感受，同埋覺得Daniel表現點樣？佢話：「整體都係同喺香港拍戲或者內地拍戲差唔多，時間都係永遠都唔夠用。好處就係外國演員拍一部戲就淨係專心拍一部，唔會搭好多其他工作，所以令到我哋度期就好方便。至於Daniel嘅表現，我覺得佢表現非常之好，尤其係講對白方面，因為佢母語就係英文，所以令佢嘅演出就更加流暢自然。」
撰文：馮仁昭