黃蜂喺季前簽咗包括林書豪在內嘅唔少新兵，佢喺上月尾球隊傳媒日就整咗個「撒亞人」箭豬頭示人，搶晒風頭，到上周六黃蜂打咗首場季前熱身賽，林書豪冇gel頭成個鄰家男孩咁樣，不過佢首次代表黃蜂上陣表現絕對唔失禮，後備入替貢獻17分同七次助攻，助黃蜂作客106:100擊敗魔術。
拎17分七助攻挫魔術
新一季NBA仲有唔夠一個月就開打，各隊喺近日陸續展開季前熱身賽。將會喺下周日喺深圳同快艇進行NBA中國賽嘅黃蜂，喺上周六作客魔術，變番清爽髮型嘅林書豪被列為後備，由K獲加（Kemba Walker）擔任正選控衞，不過前者上陣時間唔少，有成25分鐘，仲攻入全隊最高嘅17分，兼貢獻七次助攻；至於另一新兵小前鋒巴登（Nicolas Batum）表現亦唔差，有14分同九個籃板球。唯一可惜嘅係，另一位前鋒基徹斯特（Michael Kidd-Gilchrist）喺第二節退下火線，經檢查後證實右邊膊頭甩骹，要留喺奧蘭多接受治療，至少肯定唔可以喺周日對熱火場熱身賽候命。
來季年薪大幅減至214萬美元（約1,658萬港元）嘅林書豪，賽後都冇為佢自己嘅好表現顯得太高興，反而比較關心隊友基徹斯特嘅傷勢，喺自己twitter度留言：「祈求@MKG14（基徹斯特）快啲好番，健健康康呀兄弟！」認真識做人呀。
至於同日另一場NBA季前熱身賽，溜馬喺主場輸波，105:110不敵塘鵝，「一眉」安東尼戴維斯（Anthony Davis）攻入18分兼搶到八個籃板球。