港籃（圖）上禮拜六喺亞錦賽僅得12名，大軍噚日冒住颱風「彩虹」由中國長沙抵港。航班延誤足足四個鐘，搞到班港將好鬼攰，不過隊長惠龍兒（Duncan）提起CBA三隻字特別醒神，仲透露最快16/17球季就可以北上圓夢。
部份港籃返港即復操
港籃其實上禮拜五已經完成亞錦賽，但就睇埋決賽先走，點知噚日返嚟就撞正颱風，原本晏晝三點到，等到夜晚七點先順利降落，部份球員今日一樣冇得唞，要向球會報到復操。雖然係攰，但Duncan話值得：「今屆對唔少年輕球員係好寶貴嘅經驗，如果可以恒常訓練，希望下屆真係可以殺入八強。」
喺內地時，Duncan已透露有內地球隊聯絡佢，噚日佢仲話：「之前喺香港都有國內球隊對我表示興趣，但今次先真正同佢哋接觸，可惜係CBA球隊嘅組軍大致完成，最快都要再下一季先可以北上。」Duncan話現時會專心為南華備戰，亦同三支CBA球隊保持聯絡，希望好快可以試吓職業化嘅訓練模式，趁後生磨練自己。