巴塞隆拿喺上周六西甲又輸波，作客1:2不敵西維爾。美斯繼續養傷，由喺呢場波第100次代表巴塞上陣嘅尼馬擔大旗，一心諗住可以沖喜吓威番次，點知有表現冇運氣，射球靚罰球中兩次門柱都唔入，連個天都唔幫佢。
今季巴塞錄最差防守
今季歐洲幾大聯賽嘅衞冕球隊都齊齊跌watt，英超嘅車路士同意甲嘅祖雲達斯𠵱家都位列積分榜下游，巴塞叫做好少少仲喺前列，但美斯有排先復出，近三場聯賽輸咗兩場，各項賽事一共踢咗12場波加埋失咗20球，據報係自64/65球季以嚟嘅最差防守紀錄，教練安歷基都要諗吓計。
28次射門僅靠12碼破蛋
上周六西甲作客出戰西維爾，安歷基繼續排出三箭頭，除咗鐵膽尼馬同蘇亞雷斯之外，仲派出小將蒙尼亞艾哈達迪頂替美斯個位。巴塞喺上半場攻勢唔少，22分鐘尼馬博到罰球，由佢親自操刀，點知個波中柱後彈向門將沙治奧列高背脊再中多次柱，喺白界前碌過，之後碧基同蘇亞雷斯喺呢次混戰中都搞唔掂。巴塞喺呢場波全場有28次射門，總共有四次中柱，似乎整定贏唔到咁。西維爾喺下半場早段由高恩迪利同埋伊保拉各建一功領先兩球；到74分鐘巴塞靠對手喺禁區犯手球，由尼馬主射12碼破蛋，喺巴塞第100場波雖然贏唔到，都叫有個安慰獎。
安歷基賽後都好無奈：「我哋喺場波製造咗好多機會，但贏唔到都係冇意思，踢成咁竟然只係入得一球，真係難以置信。」巴塞喺今季真係頭頭碰着黑，主力受傷、新兵註唔到冊、防線水準大跌、𠵱家連運氣都冇埋；惟有祈求盡快度過難關，捱到年尾美斯復出，新兵亦可以喺一月候命。
踢完呢輪賽事，歐洲聯賽暫停一周，讓路畀國際賽，尼馬亦可以唞一唞，因為喺周四開打嘅南美區世盃外圍賽，尼馬繼續要停賽，冇得代表巴西上陣。尼馬喺今夏美洲國家盃輸畀哥倫比亞場分組賽領紅被逐，仲重罰停賽四場，國際體育仲裁法庭喺日前駁回巴西足協嘅上訴，尼馬依然要喺未來兩場世盃外停埋剩番嗰兩場。