跑在路上，據講由於體力消耗得緊要，個人嘅戾氣會自然減少，但事實係我跑步（圖）嘅時候，比行街散步時躁得多！屈指一算，最近跑步起碼遇過六宗罪。
1.頭搖又尾擺：平時真係唔覺，原來好多好朋友一齊行街係鍾意打橫行，你左邊我右邊，頭貼頭手拖手密不透風，破解方法係高速打側45度中間切入。
2.伸手阻人協會：香港嘅緩跑徑出名似木人巷咁夠晒窄，咁好好地一個慢線，一個快線原本各行各路，但係慢線嘅姐姐有時會突然使出一招大海無量嚟個雙手打橫截劫，本來呢招殺傷力唔高，加上師奶們手力有限，但係衰在出其不意、命中率奇高，加上主動撞埋去嘅係你，梗係吹罰你啦儍仔。
3.擔遮障礙賽：同又要威又要戴頭盔有所不同，要跑又要開遮跑一族其實係值得欣賞嘅，因為一手擔遮固然chok唔到手，仲要把遮食晒風，情形同孭住個車轆跑嘅高手有同工之妙，根本就係對自己有要求，所以萬一咁好彩俾佢拮中，係榮幸嘅。
4.釣着你條尾：跑過海濱附近經常有白色恐怖感，因為當見到釣魚一族大動作拋出魚鈎時，我即刻原地踏步兼碌大雙眼，但都永遠見唔到個魚鈎喺邊，嗰一刻淨係擔心萬一佢勾着我眼球，而我仲跑緊嘅話。
5.無啦啦鍊過：已經跑得慢啦，但跑跑吓唔知邊到會走位仁兄出嚟，原本喺我後面，突然去咗前面，大佬呀，唔係好想長期聽住另一個麻甩佬嘅呼吸聲跑囉。
6.食煙迷暈你：本身就係兩種人，你覺得我跑步戇居，我認為你食煙樣衰，都冇所謂，大家天各一方好地地，偏偏公園前後總有一兩個煲煙區，而啲煙味係會散開去㗎嘛，跑緊步嘅人一呼一吸又大啖啲喎，衰過慢慢行。
以上六宗罪，應該都係懲罰我哋跑得唔夠快，同冇速度嘅人。
KEYMAN
節目主持
電郵：mailto:[email protected]