開學已經近一個月，5D班副班長一職仍然懸空。大埔劉皇叔紀念小學（劉小）是區內首屈一指的學府，家長都以子女能夠入讀而為榮，據聞能在校內當個班長副班長風紀隊長，對未來升學更是妙不可言的履歷（好似係）。這所歷史悠久的學府，之所以深受推崇，亦和完善的制度有關。由小三班級開始，學校會因應學生的學術、操行和校內活動表現，給予校內公職提名，然後由同學投票選出，堪稱小學學界搞得最好的獎勵制度。有說劉小學生普遍的優異表現，和獎勵制度十分有關。
對於副班長懸空，小息時，同學都議論紛紛。
「明明話陳小敏會做副班長，上次全班同學都舉手畀佢做喎。」馮小嬌既天真，心地又善良。
「乜你唔知咩？上次陳小敏參加校際音樂比賽，喺港鐵站俾職員話佢大提琴過長，出咗封警告信畀佢啊！」李偉強在班內消息靈通。
「咁關做副班長乜事？」
「咁啊，收警告信喎，咁即係佢唔啱啦！咁老師咪話暫時唔畀佢做住囉！」
「咁又係……」
「最重要係佢冇資格！」班長張國李每年都考第一名，連他爸爸和爺爺就讀劉小時，也是校內的高材生，可以說是劉小的名門望族。故此，雖然張國李為人高傲，和同學做group project時比較獨裁，老師還是委以重任。「佢冇考過第一名，連第二名都冇考過，點解佢有資格做副班長？」
「但係佢舊年喺校際音樂節攞第一名喎？」馮小嬌有點替陳小敏抱不平。
「校際音樂節？乜嚟㗎？未聽過喎！」范啟泰同學加一把嘴，他外表比較敦厚，老師和同學經常以為他說話中肯，其實他最刻薄（當然他也參加過校際音樂節，結果慘不忍睹）。
"Good morning class!"同學聊着，不覺班主任陳老師已經進了班房，連忙返回座位。「喺宣佈副班長任命之前，我想同各位同學分享一件事。大家都知道作為學生，品德係好重要。大家可能覺得好奇怪，點解我唔畀陳小敏做副班長。陳小敏，你自己講！」陳小敏戰戰兢兢站起來，「上星期……我喺樓梯口見到陳老師，佢唔小心跌親，幾個同學上前問候陳老師，而我……嗚嗚……」看着陳小敏哭了起來，陳老師接着補充：「而陳小敏同學當時並冇慰問我，所以我認為，咁冇品德嘅同學，並唔適合擔任副班長一職……」
陳老師當然不會交代，他和陳小敏的爸爸在上個學期的家長日吵過一架。而一場小學雞的副班長任命，也就此落幕。
Profile
前新聞記者，動物NGO工作者。現為自由傳媒人兼「另類生態學家」，透視傳媒生態、動物生態、社會生態。《反智動物》討論最高智商靈長類動物之種種反智行為。
編輯：陳國棟
美術：吳子豪