零售市道轉差，太子珠寶鐘錶主席鄧鉅明不時接受訪問，坦言生意難做，但他卻馬場得意，皆因今個馬季開鑼日，他的愛駒「閃耀鑽皇」喺沙田草地1200米，爆出23倍冷門開齋，除咗鄧鉅明及練馬師容天鵬，更好運的是騎師鄭雨滇，本來「閃耀鑽皇」當日配柏寶，但他賽前試閘墮馬受傷，「閃耀鑽皇」因而換上鄭雨滇，滇仔亦交足功課，柏寶做咗觀眾，有得睇冇份贏，不過家陣柏寶好番晒，老實不客氣，搶番「閃耀鑽皇」來騎，將角逐周日(4日)的四班同程1200米。
容天鵬透露，刻意安排「閃耀鑽皇」贏馬後加以辣操，以保持勇態，仲話明連捷機會樂觀。
容天鵬解釋說：「『閃耀鑽皇』上季1月下旬落第後未再跑，3月初一對後肢曾受傷不良於行，需要矯形，幸而情況唔算嚴重，並成功醫好了。上場乃休息7個多月復出，跑1200米排最不利的14檔起步，馬兒沿途走三四疊望空跑，入直路仍可交出凌厲衝刺，彈甩贏馬而回，難度甚高，足見厲害，表現令我很驚喜。今仗仍留喺四班負126磅，當然上風到不得了。由於距開鑼日已一個月，為免隻馬鬆懈，有必要辣操，日前特登安排由柏寶彈草閘，希望省起牠的火氣，目前狀態較贏馬時有過之而無不及，抽7檔遠好過上仗14檔，機會當然樂觀啦。」