呢個月影碟界都幾熱鬧，有《復仇者聯盟2：奧創紀元》、《五個小孩的校長》、《明日世界》等多套大片推出，碟舖老闆昌哥雖然冇博士學位，但個個禮拜都識慰問龍叔叔，好關心我會寫邊隻影碟，仲話今年重頭影碟《侏羅紀世界》剛派貨，已經留定隻3D版畀我咁話。龍叔叔都好想睇恐龍，不過之前已經喺4Dx戲院睇過，反而醒起有隻坊間口碑極好嘅《末日先鋒：戰甲飛車》擺咗喺度仲未開封，索性就寫呢套先。當初戲院上畫，到藍光碟推出成個禮拜都未睇，除咗龍叔叔掛住喪打《潛龍諜影》外，好大原因係見到個戲名《末日先鋒：戰甲飛車》，已經唔多願擺入碟機，因為戲名實在老套低B兼而有之，𡃁仔卡通《爆旋陀螺》個名都有型過佢，搞到好多年輕戲迷同我一樣唔多畀面，事實上佢係一套畀戲名累死嘅佳作。
導演寶刀未老
古仔超簡單，講地球生態因核戰幾乎完全摧毀，周圍都係荒涼沙漠地帶，食水同石油比黃金珍貴，死剩嘅人類就各據山頭自立為王，四出搶奪欺壓平民，主角無端端走上反抗軍之路，中間仲有段婆婆死守一包花花草草種子嘅劇情，話係世界希望喎。咦，乜劇情熟口熟面成咁？仲唔係《北斗之拳》個世界觀？爭啲以為主角會篤人幾下，跟手懶型咁講句：「你已經死了！」咪誤會，查實《末日先鋒：戰甲飛車》係導演George Miller翻拍自己36年前作品《Mad Max》三部曲，當年武論尊仲未度到《北斗之拳》，分分鐘係調番轉「被啟發」都唔定。
講番George Miller，已屆七十高齡，到今日居然仲有心有力，拍到勁到無倫嘅動作場面，一堆重裝鐵甲車喺沙漠追逐互撞，不停反車同爆炸，而且大部份飛車爆破場面，都係實拍而唔係匿喺冷氣房拋畀特效組諗掂CG，睇落真實刺激好多，分鏡、視覺效果一啲都唔out，簡直出色過漆黑中嘅螢火蟲，難怪奪得2015年國際影評人協會最佳電影嘅榮譽。不過要為導演澄清一下，好多戲迷以為《末日先鋒：戰甲飛車》係reboot 1979年舊作，其實從George Miller發佈嘅前傳漫畫嚟睇，應該屬新嘅三部曲續集，全球口碑咁好，話唔定好快上埋第二集。喂，呢下叻過佐治魯卡斯好多喎，起碼自己拍番，唔使認老而畀版權迪士尼拍《星戰》吖。
角色造型夠變態
套戲兩粒鐘長，齋睇沙漠加飛車，實難以取悅觀眾，電影就將末世荒謬感玩到盡，大部份角色造型騎呢古怪兼帶有SM味道，好似煉油城Boss咁，全套西裝以為好elegant，點知喺胸前開窿，以鐵鏈穿起兩邊乳頭，變態到暈；軍閥Immortan Joe為五個老婆鎖上嘅貞操帶，包保偷食者細佬「有入冇出」；仲有斷手女主角同被鎖上鐵口罩嘅男主角等等，帶出一種末世冇王管、群魔亂舞嘅荒誕人性，睇得好過癮。
藍光碟表現屬上佳之作，就算大部份場口都係沙漠，冇乜colorful畫面，但都睇到沙漠同金屬層次感，而且有好多如長矛飛埋身之類場面，擺明為3D而設，唔似一般「扮3D」電影咁搵笨。音效用咗杜比7.1，定位及高音清脆度不過不失，只略嫌低音重手少少，撻吓引擎都震跌咗喇叭隔籬個公仔，唔怕嘈嘅人呢隻應該會係炸機天碟。最後，又係冇bonus同花絮，好失望，龍叔叔幾咁意猶未盡都冇計，只好拎番隻碟出黎，跳回現實繼續趕稿。
Profile
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
編輯：陳漢榮
美術：楊永昌