房地產代理公司高層在馬場碰到左丁山，吐樓市苦水多過講馬，佢入馬場只為應酬，捧朋友隻馬（輸了），唔似得左丁山真係集中精神吼馬也，佢講到新一代80後、90後買樓，其實係消耗上兩代香港人購買力，左丁山話想知多啲，於是佢又講吓趣聞：一位30歲男士要買樓，問父母攞錢交首期，因現在金管局對按揭睇得緊，最後還欠五十萬元先至可以上會，買樓男子最後對阿嫲講：「阿嫲，你四代同堂，係難得好事，但我個仔冇樓住，好唔方便呀，唔通四代住埋一間屋咩。」有大屋咪可以四代同屋囉，但香港住宅面積偏細，邊有咁理想吖，最後阿嫲帶埋個孫到銀行，從儲蓄戶口轉戶五十萬元俾個孫，於是皆大歡喜。
呢位高層講到，如果阿爺阿嫲有餘錢，有時都幾慷慨㗎，現時樓價高，年輕人上車，真係需要闔家之力幫忙。聽過高層之言，左丁山想起，舊年在本欄講過新亞師姐呂令意（前何文田官中校長）退休後熱情推動「祖父母日」，弘揚孝道，非常有道理，但現在是否由祖父母「孝順孫兒」，幫第三代買樓呢？
時間過得快，第三屆祖父母日又嚟嘞，呂師姐來郵通知，今屆特別請到大師饒宗頤寫一個「孝」字，作為「祖父母日」之標誌，參加呢個活動嘅報名、提名截止日期係十月五日，有甚麼活動呢？在十一月八日「祖父母日」星期日頒獎嘅活動有全港書法比賽，作文比賽，標語創作比賽，朗誦比賽，繪畫比賽，微電影製作比賽，選舉「最敬愛祖父母」等，請上網www.hkasc.org.hk，電郵查詢：[email protected]（即香港長者協會），亦可透過fb : www.facebook.com/grandparentday。
如果左丁山提名，一定提名無私撥款俾孫兒做買樓首期嘅祖父母。一位老友馬主F聽完地產代理高層講古仔，就幾驚樓市終會爆煲，因為靠阿爸阿媽、阿爺阿嫲提供家內第三代買樓近五成首期，終非長久之計，代理高層話最有錢一批，直情一擲千五萬俾仔女買豪宅，唔駛佢地供樓㖭，因為知道仔女份人工係用來享受人生，唔想有供樓束縛也，馬主F不禁喟然而嘆：「30年前我帶仔女及父母去旅行，全程旅費我出晒，今年暑假帶仔女，內孫外孫及父母去旅行，四代嘅旅費又係我出晒。香港60零歲嘅男人，直情係香港經濟最大支柱也！」