賭王何鴻燊長房孫女何家文（Sarah）在倫敦成立自家名字的珠寶品牌，以自傳式訴說人生章節，如賭王阿爺的幸運數字「9」、嫲嫲愛珠寶的薰陶、模特兒母親的60年代風格。她人生最重要的一章，莫過於兩歲時父母車禍雙亡，自始訓練出硬頸獨立的性格，幸好她學懂從悲慟中釋放，兼有賭王爺爺痛錫並嚴謹教誨，令Sarah欣賞生活中的每種「小確幸」。
撰文：梁錦雯
賭王何鴻燊的家庭事，近年大抵都由三四房兒女如超蓮、超盈、猷君等感情事接力。一直以來，關於長房的新聞不算多，他們低調甚少出席公開場合，或移居海外生活。如長房孫女何家文在香港出世、澳門長大、英國定居，更在倫敦發展以自己名字Sarah Ho London的珠寶品牌接近10年，在當地媒體中卻甚少提及她有一個響噹噹的賭王爺爺。
Sarah今年回流在港澳兩地開拓市場，才知她已在倫敦珠寶界漸有名聲，日前她與意大利夫婿Samuele Serreli處理業務，並接受了本報專訪。Sarah的遺傳了父親何猷光及模特兒母親Suki的輪廓，但能操字正腔圓的廣東話，她多次提及自己是香港人、澳門大的根源：「我不嬲有個夢想，想帶個品牌返嚟，個品牌都差唔多10年，想睇吓有乜反應。」
自小受賭王孫女的光環加冕，Sarah渴望擺脫家族聲名的壓力：「細個返學，會叫司機丟低我，等我自己行入門口，由細到大，自己想朋友知道係同我做朋友，段友誼係真。去到英國生活更加自在，想同當地設計師一齊咁競爭，啲嘢全部都係自己做返嚟。」
包拗頸學揸車
Sarah成長的環境有別於其他家族成員，父母在她兩歲時因車禍喪生，她與家姐何家華相依為命，由嫲嫲及姑姐等照顧，催化她成熟性格：「我由細到大自己一個人，家人喺度，但都唔似有爹哋媽咪喺度，我同家姐由細到大都好獨立，去英國讀書都唔驚，好似一個新挑戰，人人都有唔好嘢會發生。」還好Sarah豁達面對遭遇：「我會選擇聽日係新一日，每一日都要有passion。」Sarah以硬頸形容自己性格，為克服陰霾，18歲就去考車牌：「家姐冇陰影，鍾意揸快車，我就好驚自己揸車，揸車會出晒汗，唔敢揸咁快，每次都好緊張，畀老公笑死，要去證明自己唔怕。」
在英國長大，Sarah仍心繫家人，如她設計珠寶當中，愛以自傳形式為題材，如加入以賭王爺爺及嫲嫲的幸運數字「8」與「9」、啤牌元素。賭王在Sarah成長期間是大忙人，仍十分痛錫Sarah，如她06年在意大利結婚，他亦飛去做證婚人：「爺爺係大忙人，細細個成日同我哋講讀書好緊要，要勤力，所以我做嘢最大啟發係見到阿爺，係一條命入面達到好多嘢。佢一啲都唔會縱我，好嚴謹，做錯嘢梗鬧。」
嫲嫲首飾啟思
在Sarah心目中，嫲嫲及母親Suki更是她設計的繆思：「嫲嫲啟發我鍾意珠寶，佢日日唔同首飾，就算下午茶都戴晒唔同首飾， 6、7歲見佢啲首飾好多色彩，好似糖，唔使特別教我點襯，望到已經識，佢真係好有taste。媽咪係我繆思，佢以前喺英國做模特兒，永遠都好有型，佢個時唔喺度，我收咗好多佢嘅首飾，睇起嚟好得意，所以我啲設計係我嫲嫲首飾、加埋阿媽嘅Swinging Sixties大件風格，夾埋一齊就係我嘅style。」與家人分隔兩地，Sarah常有感激之心，亦相信命運：「唔會有條命乜都有，呢邊有多啲、個邊會少啲，我有幸福家庭，唔幸福冇咗老竇老媽子，所以做人最緊要知足唔好貪心，自己夠就開心。」
服裝：Lanvin
場地：卅二公館