【本報訊】面對競爭者挑戰及壯大，代理經營模式轉變，中原集團邀請「在野」逾廿載的王文彥重返董事局，令上市重現曙光，務求集資打硬仗，免被內地代理銀彈政策吞噬。中原集團主席黎明楷接受本報訪問表示：「王生入董事會，先有機會向上市條路行。」
創辦人王文彥回歸
中原地產在1978年由施永青與王文彥創辦，1992年王文彥離開，持有股權至今。股權分佈包括施永青（佔45%）、王文彥（佔45%）及黃偉雄（佔10%）。施永青表示：「分開咗咁耐，希望合作先再度喺一齊，合作成點，將來先知。既然返來，梗係希望產生積極作用。上市要王生認同，因為他是大股東，目前爭取同佢合作囉！」王文彥回應：「一切以公佈為準，暫時沒有補充。」
黎明楷稱，上市是迎接地產代理市場的新衝擊，香港業務本身沒有上市的必要，主要是內地，「大陸好多新模式，行家透過收購及注資擴大規模。如果我哋一路靠自己賺返來嘅錢、大股東注資玩呢個遊戲，會唔夠人玩，因為人哋燒錢能力高。」目前中原集團在內地運作模式有需要調整，「以往我哋睇嚟緊呢季、或者半年，有冇錢賺先，如果唔妥，市唔好，就收縮。」不過行家卻淡市擴充，「好多行家本來比我細，但佢一路頂一路頂，而家仲大過我哋，咁樣的做法，我哋需要反思，係咪資金運用無對方咁進取呢！」
中原在內地主要競爭對手是鏈家，黎明楷稱，鏈家今年於內地進行多項大型收購，一下子已超越他們於內地的規模。以上海為例，年初收購當地第二大地產代理公司，該公司在上海由約300分店現增加至1,000間，「我哋都有一路增加，但都是由400間增加至500間，差成倍。睇見人哋咁搞，我哋有冇野做下先，如果唔係，你睇住佢一路開，會一路噬過來！」他不諱言：「你睇到危機，如果國內有競爭對手打敗我哋，雄霸市場，遲早會殺到來香港，對我哋在香港會有危險。」