這天國慶賽馬日重頭戲1400米三級賽慶典盃，結果全場最輕磅五匹雙位數大冧巴馬包辦四重彩，高分重磅馬全軍盡墨，冇一隻入到前四名。
今場大熱門是10號蔡廐馬「詠彩繽紛」，在雷神胯下後上掄元，雖只小勝「大印銀紙」半身位，但姿態極輕鬆，五歲精英取得跨季三連勝，服役十戰七捷一亞，賽績彪炳，上季最大進步馬匹獎得主，今季繼續進步，穩佔今年國際賽一個主隊代表席。
至於次熱門13號馬「大印銀紙」後上與「詠彩繽紛」包辦5.5倍大熱Q，練馬師高伯新同「大印銀紙」馬主潘蘇通，上年憑「大運財」勝出慶典盃，今日宣告衛冕落空。第三名為上屆同一賽事亞軍14號馬「好健康」，11號「同個夢想」與12號「和順超影」一齊衝線，影相不分高下，成為平頭殿軍，四重彩兩瓣均派三千幾蚊。
「詠彩繽紛」4次配雷神全勝，肯定是最佳拍檔，但未來「詠彩繽紛」大有機會換人，蓋10月25日沙田錦標香港二級賽1600米，就算「詠彩繽紛」不與黑衣巨人「步步友」碰頭，到了11月21日國際二級賽馬會一哩錦標，兩駒亦應該會正面交鋒，正常情況下雷神揀騎馬王「步步友」機會較高。