最近內地官媒不停向長和主席李嘉誠發炮，鬧佢過橋抽板，超人仲罕有發聲明還擊。2012年獲李嘉誠力撐做特首嘅全國政協常委唐英年，噚日喺騰訊微博貼文為呢位企硬無轉軚變梁粉嘅支持者平反。
唐唐喺題為「商人愛國，共創明天」嘅微博中強調，全球經濟一體化趨勢下，國家同企業都作出相應部署，按照市場化方式行事，為整體發展尋求最有利嘅安排。佢話留意到近期有個別文章對李嘉誠作出指摘，力撐李嘉誠係首批參與投資內地嘅港商、積極參與內地公益事務，「這些指摘傷害了傳統中國人的一顆愛心，李先生心裏有氣自然可以理解」，支持超人澄清，仲強調「近期有關長和集團遷冊海外、甚至撤資嘅指摘，既不真實，亦忽略市場運作，對李先生並不公道」，唔知特首梁振英又會唔會為李嘉誠講句「公道話」？