呢輪不時收到XX代理公司嘅經紀cold call：「左先生，有冇思思賣盤呀，有唔少客渴求XX園大單位。」至於經紀點知道屋企電話，不必深究，總之一旦買過樓、賣過樓，個人住址電話就不會係秘密，唔通吓吓向私隱專員投訴咩，嘥氣啦。應付呢啲電話，最簡單答案就係：「No」，講完就收線。但唔夠幾秒，經紀又有電話嚟：「左先生，九肚山有新樓盤九龍山即將推出，有冇興趣預留一間。」答案當然又係「No」啦。
講起「九龍山」，似有印象，好似在一架綠色小巴嘅車身廣告見過，第一個反應係「九龍山」在九龍那裏？就好似十年前坐的士叫司機去「曼克頓山」一樣，記得當時司機反問：「九龍邊度有個山叫做曼克頓山呀？」話俾佢聽：「美孚附近呀！」司機更迷惘：「美孚喺海皮喎邊度有個山呀？」
樓盤名稱就往往因此產生誤會，好似以前火炭半山「晉名峰」推出之時，廣告講：「九肚山麓」，令的士司機揸車上咗九肚山一樣。經紀一提，方知「九龍山」就在原九肚山之另一邊，由麗坪道直上，由九肚山不能直達，仍屬豪宅區。聽完電話之後兩三日，見到幾張報紙講新樓盤「九龍山」，圖文並茂，睇完就唔想去實地睇樓囉，因為「九龍山」地盤最靠近山邊，前面有六七個地盤，最開揚有海景可望到大埔觀音嘅未來樓盤，就全部在前面，一個屬新鴻基地產，另一個屬永泰，如「九龍山」住戶最先入伙做開荒牛，以後幾年就只係望建築地盤，聽打樁，全部地盤建成豪宅後，「九龍山」住戶就望住人家住宅或山景！
適逢賽馬日在馬場廂房碰到XX代理嘅一位高層，於是向佢攞料兼係咁意投訴佢嘅下屬打電話嚟左家。高層猛拍左丁山膊頭：「大佬，體諒吓啦，現在樓市成交進入冰河期成交極少，我好多伙記成個月開唔到一張單，我地好慘呀。」報紙所講成交數字確是如此，如有一手樓盤推出，先至叫做有啲成交，但高層講：「講真，聯儲局落實加息嘅話，我驚樓價卒之會跌！依家二手樓業主係唔肯減價，與買家僵持，故此成交好少，新樓盤發展商個個有錢，唔會減價促銷，只會提供更多優惠引你上會供樓。我地見到買家購買力主要來源係阿爸阿媽，以至阿爺阿嫲，簽字買樓嘅年輕人根本係靠晒屋企人，即係話樓市正在消耗緊上兩代香港人嘅購買力，好容易乾塘㗎！」